សម្ដេចតេជោ ហ៊ុន សែន៖ កូវីដ១៩ ធ្វើឲ្យប្រព័ន្ធឌីជីថលក្នុងវិស័យអប់រំនៅកម្ពុជា ដើរមុនផែនការ១០ឆ្នាំ (Video inside) (ព្រុចសែល-ប៊ែលហ្សិក)៖ ថ្លែងចេញពីទីក្រុងព្រុចសែល ប្រទេសប៊ែលហ្សិក នៅយប់ថ្ងៃទី១២ ខែធ្នូ ឆ្នាំ២០២២នេះ (ម៉ោងនៅកម្ពុជា) សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានប្រាប់ទៅកាន់ប្រជាពលរដ្ឋខ្មែររស់នៅទ្វីបអឺរ៉ុបថា ក្នុងវិបត្តិជំងឺកូវីដ១៩ រាជរដ្ឋាភិបាលមានការព្រួយបារម្ភជាក្ដីចំពោះការខកខានសិក្សារៀនសូត្ររបស់សិស្ស គ្រាដែលកម្ពុជាត្រូវបានបិទខ្ទប់ជាបន្ដបន្ទាប់។ ក្នុងជំនួបជាមួយប្រជាពលរដ្ឋខ្មែរប្រមាណ២ពាន់នាក់ សម្ដេចតេជោ ហ៊ុន សែន បានអះអាងថា បើទោះបីវិបត្តិជំងឺកូវីដ១៩ បានធ្វើឲ្យរាជរដ្ឋាភិបាលកម្ពុជា បារម្ភចំពោះការខកខានរៀនសូត្ររបស់សិស្សានុសិស្សដោយផ្ទាល់ក្ដី ប៉ុន្ដែការសិក្សាតាមរយៈប្រព័ន្ធអនឡាញ ក៏ជាឱកាសមួយថ្មីផងដែរសម្រាប់កម្ពុជា។ ក្នុងវិបត្តិជំងឺសកលមួយនេះ បានធ្វើឲ្យប្រព័ន្ធឌីជីថលក្នុងវិស័យអប់រំ នៅក្នុងប្រទេសកម្ពុជា ដើរមុនផែនការរហូតដល់ទៅ១០ឆ្នាំ។ សម្ដេចតេជោ ហ៊ុន សែន បានមានប្រសាសន៍យ៉ាងដូច្នេះថា «កង្វល់របស់យើងនៅពេលនោះ បញ្ហាគឺបិទសាលារៀន ដែលសិស្ស និស្សិតរបស់យើងប្រមាណជិត៤លាននាក់ឯណោះ រៀនតាមអនឡាញ ដែលនេះក៏ផ្ដល់នូវកាលានុវត្តន៍ភាព (ឱកាស) ដូចគេថា វិបត្តិ តែងមានកាលានុវត្តន៍ភាព។ កូវីដបែរជាជំរុញឲ្យមានការរីកលូតលាស់ខាងបច្ចេកវិទ្យាព័ត៌មាន កាន់តែខ្លាំងនៅក្នុងប្រទេសកម្ពុជា។ ឌីជីថលអាចដើរលឿនមិនតិចជាង៣ឆ្នាំទេ បើក្រសួងអប់រំគេថាទៅមុន១០ឆ្នាំ ព្រោះសិស្សរាប់លាននាក់រៀនតាមអនឡាញ»។ ចំណុចនេះ សម្ដេចតេជោនាយករដ្ឋមន្ដ្រី បានបញ្ជាក់ទៅកាន់ប្រជាពលរដ្ឋខ្មែររស់នៅក្រៅប្រទេស ពិសេសប្រទេសជឿនលឿន ប្រយ័ត្នដើរមិនទាន់ប្រជាពលរដ្ឋខ្មែររស់នៅក្រៅប្រទេស។ សម្ដេចតេជោ ហ៊ុន សែន បន្ដថា នៅក្នុងប្រទេសកម្ពុជានាពេលបច្ចុប្បន្ន​ប្រព័ន្ធឌីជីថលដើរលឿន សូម្បីតែរបៀបបង់លុយនៅលើផ្លូវល្បឿនលឿន គឺឈានទៅដល់ការមិនចាំបាច់បង់លុយដោយផ្ទាល់ទៀតផង។ សូមរំលឹកថា នៅក្នុងដំណាក់កាលនៃការឆ្លងរីករាលដាលជំងឺកូវីដ១៩ ដំបូងនៅកម្ពុជា រាជរដ្ឋាភិបាលបានបង្ខំចិត្តប្រើប្រាស់នូវវិធានការបិទខ្ទប់ ដើម្បីទប់ស្កាត់ និងឈានដល់ការកាត់ផ្ដាច់ការចម្លងជំងឺដ៏កាចសាហាវមួយនេះ រហូតឈានដល់ការបិទខ្ទប់សាលារៀន ទីផ្សារ ដាក់ចេញនូវបម្រាមគោចរ និងបិទខ្ទប់ប្រទេសមួយរយៈពេលផងដែរ។ សម្រាប់វិស័យអប់រំវិញ ដោយសារតែការបិទខ្ទប់នេះហើយបានធ្វើឲ្យសិស្ស និស្សិតទាំងអស់ ត្រូវសិក្សាពីចម្ងាយតាមប្រព័ន្ធអនឡាញ។ បើទោះបីលំបាកបន្ដិចនៅពេលចាប់ផ្ដើម ប៉ុន្ដែក្រោយមកសិស្ស និស្សិតបានសម្របខ្លួនងាកមកប្រើប្រាស់ប្រព័ន្ធឌីជីថលនេះ ដើម្បីមានឱកាសបានសិក្សានៅអំឡុងពេលនោះ៕