ពិធីប្រារព្ធខួបទី២០ឆ្នាំ នៃសាលាសណ្ឋាគារនិងទេសចរណ៍ ប៉ូលឌុលប្រ៊ូល ខេត្តសៀមរាប មានការចូលរួមពីលោក ថោង ខុន រដ្ឋមន្ត្រីក្រសួងទេសចរណ៍ លោក Paul Dubrule ស្ថាបនិករូបបករណ៍ នៃសាលាសណ្ឋាគារ និងទេសចរណ៍ ប៉ូលឌុលប្រ៊ូល លោក ពេជ្រ សោភណ្ឌ័ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ និងលោកស្រី ម៉ននី រងី្ស អភិបាលរងខេត្តសៀមរាប។

លោក ថោង ខុន រដ្ឋមន្ត្រីក្រសួងទេសចរណ៏ បានលើកឡើងថា យុវជនរាប់ពាន់នាក់ រាប់ពាន់គ្រួសារ រាប់ពាន់អាជីវកម្ម ទេសចរណ៍ បានទទួលប្រយោជន៍​ដោយផ្ទាល់​ពីសាលាសណ្ឋាគារ និងទេសចរណ៍ ប៉ូលឌុយប្រ៊ូល ដែលទាំងនេះ គឺកើតចេញពីបេះដូង និងទឹកចិត្តសប្បុរសរបស់លោក​ ប៉ូល ឌុយ ប្រ៊ូល និង គ្រួសារ។ គិតមកដល់បច្ចុប្បន្ន តាមការឲ្យដឹងរបស់សាលា លោក ប៉ូល ឌុយប្រ៊ីល និងគ្រួសារ បានបរិច្ចាគថវិកាផ្ទាល់ខ្លួនប្រមាណជាង ៩ លានដុល្លារអាមេរិក និងកៀរគរអង្គាសពីសប្បុរជន បានប្រមាណជាង ៦លានដុល្លារ សរុបនៃការឧបត្ថម្ភ មានប្រមាណជាង ១៥ លានដុល្លារ ។

លោក ថោង ខុន បានបន្តទៀតថា រាជរដ្ឋាភិបាល បានផ្ដល់ជាទីតាំងដល់សាលា និងសម្របសម្រួលដំណើរការសាលានេះ ដោយស្មារតីសហការខ្ពស់ និងបានកោតសរសើរដល់ថ្នាក់ដឹកនាំនៃក្រសួង ស្ថាប័ន ពាក់ព័ន្ធ និងឈានមុខគេក្នុងតំបន់អាស៊ាន ដែលបានចូលរួមផ្ដល់ការបណ្តុះបណ្តាលតាម ស្ដង់ដាអាស៊ាន បានយ៉ាងមានប្រសិទ្ឋភាព ហើយសិស្សជាង ៦ពាន់នាក់។

ទន្ទឹមនឹងវិធាននានាដាក់ចេញដោយរាជរដ្ឋាភិបាល ដើម្បីចូលរួមដោះស្រាយ ផលប៉ះពាល់ពីវិបត្តិកូវីដ–១៩ ក្រសួងទេសចរណ៍ និងភាគីពាក់ព័ន្ឋបានអនុវត្តនូវ ផែនទីចង្អុលផ្លូវ ស្តីពីការស្តារនិងលើកស្ទួយទេសចរណ៍ ក្នុងអំឡុង និងក្រោយវិបត្តិកូវីដ-១៩ បានយ៉ាងមានប្រសិទ្ធភាព។ ជាក់ស្តែង សម្រាប់រយៈពេល ១០ខែដើមឆ្នាំ២០២២ កម្ពុជាទទួលបានភ្ញៀវទេសចរអន្តរជាតិ ប្រមាណជាង ១, ៥៧ លាននាក់ កើនឡើង ៨៨១% ធៀបនឹងរយៈពេលដូចគ្នាឆ្នាំ២០២១។ រីឯភ្ញៀវ ទេសចរផ្ទៃក្នុងធ្វើដំណើរកម្សាន្តក្នុងប្រទេសជាង ១០,៨៦លាននាក់ កើនឡើង ក្នុងអត្រា ២៣៤% ធៀបរយៈពេលដូចគ្នាឆ្នាំ២០២១។

លោក Paul Dubrule ស្ថាបនិករូបបករណ៍ នៃសាលាសណ្ឋាគារនិងទេសចរណ៍ ប៉ូលឌុលប្រ៊ូល បានលើកពីគោលបំណងនៃកិច្ចប្រជុំ ក្នុងការត្រួតពិនិត្យពីលទ្ធផលនៃការងារអនុវត្តបានក្នុងរយៈពេល២០ឆ្នាំមកនេះ ព្រមទាំង ដើមី្បធ្វើការអបអរសាទរខួបលើកទី២០ នៃការបង្កើតសាលាសណ្ឋាគារនិងទេសចរណ៍ ប៉ូលឌុលប្រ៊ូល ដើម្បីគាំទ្រដល់ការអប់រំ និងការអភិវឌ្ឍន៍យុវជនកម្ពុជា សំខាន់លើការបណ្តុះបណ្តាលវិជ្ជាជីវៈនិងជំនាញផ្សេងៗ នៅក្នុងវិស័យទេសចរណ៍នៅកម្ពុជា៕