(រាជធានីភ្នំពេញ)៖ ចំណីអាហារគ្មានសុវត្ថិភាព បានក្លាយជាបញ្ហា និងក្ដីកង្វល់រួម ពិសេស គំរាមកំហែងដល់ស្ថានភាពអាហារូបត្ថម្ភរបស់ជនងាយរងគ្រោះបំផុត។ ក្នុងនោះ មានក្រុមមនុស្សចំនួន៥ប្រភេទ ងាយរងគ្រោះខ្លាំងជាងគេពីចំណីអាហារគ្មានសុវត្ថិភាពនេះ។ នេះបើតាមការឱ្យដឹងពី ឯកឧត្តម ឧបនាយករដ្ឋមន្រ្តី យឹម ឆៃលី ប្រធានក្រុមប្រឹក្សាស្ដារអភិវឌ្ឍន៍វិស័យកសិកម្ម និងជនបទ នៅក្នុងទិវាជាតិអាហារូបត្ថម្ភលើកទី៩ ក្រោមប្រធានបទ «“ម្ហូបអាហារកាន់តែមានសុវត្ថិភាព សុខភាពកាន់តែល្អប្រសើរ» កាលថ្ងៃទី០៤ ខែមេសា ឆ្នាំ ២០២២។

នាឱកាសនោះ ឧបនាយករដ្ឋមន្រ្តី យឹម ឆៃលី បានឱ្យដឹងថា​ «អាហារគ្មានសុវត្ថិភាព បានបង្កការគំរាមកំហែងដល់សុខភាពជាសាកល ហើយបង្កគ្រោះថ្នាក់ដល់មនុស្សគ្រប់រូប។ ជាមួយគ្នានេះ ក្រុមមនុស្សចំនួន៥ប្រភេទ ងាយរងគ្រោះខ្លាំងជាងគេ គឺទារក កុមារតូច ស្ត្រីមានផ្ទៃពោះ មនុស្សចាស់ និងអ្នកដែលមានជំងឺប្រចាំកាយ គឺជាមុខសញ្ញាជនងាយរងគ្រោះ នៃបញ្ហាម្ហូបអាហារគ្មានសុវត្ថិភាព»។  បន្ថែមពីទៀត ឯកឧត្តមថា បានសំណូមពរបណ្តាផ្នែកពាក់ព័ន្ធ ត្រូវបង្កើនយុទ្ធនាការផ្សព្វផ្សាយដល់ប្រជាជន មន្ត្រីរាជការ បុគ្គលិក និយោជិក កម្មករ ដែលកំពុងរស់នៅក្នុងមូលដ្ឋាន និងធ្វើការនៅតាមរោងចក្រ សហគ្រាស និងក្រុមហ៊ុននានា និងប្រជាពលរដ្ឋទូទៅឱ្យផ្លាស់ប្ដូរឥរិយាបទមកទទួលទាន អាហារដែលមានសុវត្ថិភាព និងរបបអាហារដែលមានសារជាតិចិញ្ចឹមគ្រប់គ្រាន់ និងចម្រុះមុខ ដូចជា៖ បន្លែ ផ្លែឈើស្រស់ ត្រី សាច់ និងស៊ុត ឱ្យបានច្រើនគ្រប់មុខ និងទៀងទាត់ ដើម្បីឆ្លើយតបទៅនឹងតម្រូវការអាហារ ដែលធ្វើឱ្យរាងកាយលូតលាស់បានល្អ មានសុខភាពល្អ និងបង្កើនប្រសិទ្ធភាពការងារ។

គួរបញ្ជាក់ថា បើតាមរបាយការណ៍របស់ការិយាល័យសុវត្ថិភាពចំណីអាហារ នៃនាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសម្អាងរបស់ក្រសួងសុខាភិបាល ក៏បានបង្ហាញដែរថា ចាប់តាំងពីឆ្នាំ២០១៥ ដល់ឆ្នាំ២០២១ មានមនុស្ស១១៩នាក់ បានស្លាប់ដោយសារពុលចំណីអាហារ និងមានអ្នករងគ្រោះសរុបមានចំនួន៤៦៩៩នាក់។

មិនតែប៉ុណ្ណោះ កាលពីកន្លងទៅថ្មីៗនេះ ក៏មានរបាយការណ៍ជាបន្តបន្ទាប់របស់អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំនៃក្រសួងពាណិជ្ជកម្ម និងក្រសួងសុខាភិបាល ដែលបានបង្ហាញពីបញ្ហាទឹកដោះគោម្សៅផ្សំតាមរូបមន្តដែលមានកម្រិតជាតិដែក និងជាតិសង្គ័សីទាបខ្លាំង ហើយបណ្តាលឱ្យទារកជាច្រើនមានបញ្ហាកង្វះជាតិដែកធ្ងន់ធ្ងន់ធ្ងរ ហើយត្រូវចូលសម្រាកព្យាបាលក្នុងមន្ទីរពេទ្យថែមទៀត៕