៥សំណួរដែលត្រូវសួរខ្លួនឯង មុនប្រឡូកក្នុងអាជីវកម្ម

ត្រូវសួរខ្លួនឯងមុននឹងធ្វើជាសហគ្រិនចូលប្រឡូកក្នុងអាជីវកម្ម

ការបើកអាជីវកម្មថ្មីថ្មោង ពិតជារឿងលំបាកសម្រាប់អ្នកដែលទើបនឹងប្រឡូកអាជីវកម្មដំបូងព្រោះអ្វីៗ ប្រៀបបានចាប់ផ្តើមឡើងពីចំណុចសូន្យ។ បើមានបទពិសោធន៍ ដើមទុកច្រើន និង មានធនធានមនុស្សគ្រប់គ្រាន់គឺជារឿងល្អមួយ តែបើអ្នកមិនដឹងថាតើត្រូវធ្វើអាជីវកម្មចាប់ផ្តើមពីចំណុចណា? ត្រូវការអ្វីខ្លះ? នោះពិតជាទាមទារឲ្យលោកអ្នកសិក្សាស្រាវជ្រាវ និង ត្រូវការជំនួយបន្ថែមហើយ។ នេះហើយជាមូលហេតុដែល បានលើកយកសំណួរទាំង ៥ ខាងក្រោមនេះ សម្រាប់ប្រិយមិត្ត ជាពិសេសអ្នកដែលមានបំណងចង់បើកអាជីវកម្មត្រូវសួរខ្លួនឯងជាមុន។ តើសំទាំងនោះមានអ្វីខ្លះ?
១) តើអ្នកមានមហិច្ឆតាបើកអាជីវកម្មរបស់អ្នកដែរឬទេ?
ជាទូទៅសហគ្រិន ដូចជាអ្នកជំនួញ ឬ មហាសេដ្ឋីនៅជុំវិញពិភពលោក តែងមានមហិច្ឆតារៀងៗខ្លួនដើម្បីបង្កើតអាជីវកម្មឲ្យជោគជ័យ។ បើគ្មានមហិច្ឆតាទេ ម្ល៉េះអាជីវកម្មរបស់សហគ្រិនទាំងនេះគ្មានផ្លូវបានឃើញពន្លឺថ្ងៃនោះឡើយ។ ដូច្នេះវាសំខាន់ណាស់សម្រាប់សហគ្រិនថ្មីថ្មោង ដើម្បីស្គាល់ខ្លួនឯងឲ្យកាន់តែច្បាស់ថា ពិតជាដាក់ចិត្តដាក់កាយ និង មានមហិច្ឆតាពិតប្រាកដចង់បើកអាជីវកម្មមួយហើយឬយ៉ាងណា។ បើមហិច្ឆតានៅមានកម្រិត ហើយមានភាពស្ទាក់ស្ទើរច្រើននោះ ត្រូវប្ដេជ្ញាចិត្តបំផុសវាឡើងឲ្យកាន់តែធំ នោះផ្លូវឆ្ពោះទៅការបើកអាជីវកម្មនឹងអាចលេចរូបរាងបាន។
២) តើអាជីវកម្មរបស់អ្នកមានសក្ដានុពលនៅលើទីផ្សារដែរឬទេ?
សំណួរនេះ នឹងអាចរកឃើញចម្លើយនៅពេលដែលលោកអ្នកបានសម្លឹងមើល និង បានស្រាវជ្រាវទីផ្សារអាជីវកម្មបានកាន់តែច្រើនឡើងពីកម្រិតនៃការទាក់ទាញ និង ការទទួលបានការគាំទ្រពីសាធារណជន។ បើអ្នក មិនដឹងថាទីផ្សារត្រូវការអ្វី មានស្ថានភាពបែបណា តើអ្នកបង្កើតអាជីវកម្មដើម្បីអ្វីទៅ? គន្លឹះដ៏ល្អនៅទីនេះ គឺមានតែការស្រាវជ្រាវទីផ្សារបានត្រឹមត្រូវ និង ច្បាស់លាស់បំផុតទេ ទើបធ្វើឲ្យអ្នករកឃើញអាជីវកម្មពិតប្រាកដមួយសម្រាប់ខ្លួនឯងបាន។
៣) តើអ្នកត្រូវការប្រាក់ប៉ុន្មាន? ចំណាយលើអ្វីខ្លះ?
ដោយហេតុថាអាជីវកម្មបើកដំបូងនឹងមិនអាចរកប្រាក់ចំណូលមកវិញបានភា្លមៗ សហគ្រិនទាំងអស់ត្រូវកំណត់ពីដើមទុនរបស់ខ្លួនក្នុងការបើកអាជីវកម្មនេះ និង រៀបចំគម្រោងឲ្យពិតប្រាកដពីការចំណាយផ្សេងៗទៀត។ អ្វីដែលសំខាន់ជាងនេះ ជាទូទៅអាជីវកម្មថ្មីថ្មោងត្រូវមានទុនបម្រុងផ្សេងទៀតត្រៀមទុកជាមុនយ៉ាងហោចណាស់ឲ្យបាន៦ខែដំបូង ដើម្បីជៀសវាងស្ថានភាពប្រែប្រួល ឬ ការចំណាយណាមួយដែលមិនអាចដឹងមុនបាន។ ក្រៅពីនេះ ត្រូវកំណត់រយៈពេលច្បាស់លាស់មួយផងដែរថា តើអ្នកនឹងទទួលបានចំណូលមកវិញនៅពេលណា (Return on Investment)? តើចំណូលទាំងនោះមានប្រភពចេញមកពីណាខ្លះ?
៤) តើអ្នកមានសមត្ថភាព និង ចំណេះដឹងគ្រប់គ្រាន់បើកអាជីវកម្មរបស់អ្នកដែរឬទេ?
គ្មានអ្នកណាម្នាក់ល្អឥតខ្ចោះនោះឡើយ ដូចភាសាអង់គ្លេសហៅថា “No One Is Perfect” ។ នេះហើយជាចំណុចខ្សោយរបស់មនុស្ស។ អ្នកក៏ដូចគ្នាដែរ ភាពចន្លោះខ្វះខាតនៅក្នុងអាជីវកម្មគឺពិតជាមាន ដូច្នេះហើយបានជានៅពេលនេះ អ្នកត្រូវកំណត់ថា តើអ្វីទៅជាភាពខ្លាំង និង ភាពខ្សោយរបស់ខ្លួននៅក្នុងការបើកអាជីវកម្ម? វិធីសាស្ត្រដ៏ល្អ អ្នកត្រូវកំណត់ពីទេពកោសល្យ ឬ ជំនាញពិសេសរបស់អ្នកដែលត្រូវមានសម្រាប់ធ្វើអាជីវកម្ម ឬ ត្រូវស្វែងយល់ថា ជំនាញធ្វើអាជីវកម្មរបស់អ្នកមានក្នុងកម្រិតណាទើបអាចបើកអាជីវកម្មបាន។

៥) តើក្រុមគ្រួសាររបស់អ្នកគាំទ្រអ្នកដែរឬទេ?
ការគាំទ្រពីសមាជិកគ្រួសារបានដើរតួនាទីសំខាន់មួយ ជាពិសេសសម្រាប់អ្នកដែលមិនទាន់មានបទពិសោធន៍រឹងមាំ ត្បិតអីនេះជាកម្លាំងចិត្តឲ្យអ្នកអាចត្រួសត្រាយផ្លូវបើកអាជីវកម្មដោយភាពជឿជាក់ និង មានទឹកចិត្ត។ គ្រួសារផ្តល់កម្លាំងចិត្តឲ្យកាន់តែច្រើន នឹងធ្វើឲ្យអ្នកមានមានអារម្មណ៍ថា អ្នកកំពុងមានបេសកកម្មដ៏ត្រឹមត្រូវមួយត្រូវធ្វើ និងមានទំនួលខុសត្រូវធំជាងមុនឆ្ពោះទៅសម្រេចបំណងប្រាថ្នារបស់ខ្លួន។ សូមលើកយកទស្សនរបស់អ្នកដោយបើកចំហទៅក្រុមគ្រួសារ ពីអ្វីដែលអ្នកចង់បាន និង ត្រូវការពីពួកគេ ទើបអ្នកអាចរកឃើញចម្លើយដ៏សមស្របជាចំណែកមួយជួយឲ្យអ្នកមានពន្លឺជាងមុន៕

Theme Color Chooser