ដូចដែលយើងបានដឹងហើយថា មនុស្សគ្រប់គ្នាសុទ្ធតែចង់ក្លាយជាអ្នកមាន មានលុយរាប់ពាន់លានដុល្លារ ឬមានសេរីភាពហិរញ្ញវត្ថុទាំងវ័យក្មេង ជាពិសេសនោះ គឺចង់មិនបាច់ធ្វើការងារ ក៏មានលុយហូរចូលក្នុងកុងធនាគារយ៉ាងច្រើន ទោះចាយយ៉ាងក៏មិនចេះអស់ដែរ។

ពិតណាស់ ចំណូលតែមួយប្រភពមិនអាចជួយឱ្យលោកអ្នកក្លាយជាអ្នកមាន ឬមានសេរីភាពហិរញ្ញវត្ថុទាំងវ័យក្មេង ឬនៅវ័យ ៣០ឆ្នាំទៅ ៤០ឆ្នាំបាននោះទេ។ អាស្រ័យហេតុដូចនេះ ហើយទើបបានជាអ្នកមាន ឬក៏សេដ្ឋីៗជាច្រើននៅលើលោក បានខិតខំប្រឹងប្រែងបង្កើនប្រភពចំណូលរបស់ខ្លួនឱ្យបានច្រើនតាមដែលអាចធ្វើទៅបានក្នុងនោះរួមមានដូចជា៖ លោក Warren Buffett ស្ថាបនិកក្រុមហ៊ុន Berkshire Hathaway, លោក Jack Ma អតីតស្ថាបនិក ក្រុមហ៊ុន Alibaba និងលោក Bill Gates ស្ថាបនិក  Microsoft សុទ្ធតែបានយកលុយទៅបង្កើតលុយជាច្រើនប្រភព ដើម្បីឱ្យលំហូរសាច់ប្រាក់របស់ពួកគាត់កាន់តែមានភាពមានបានឡើងៗទោះចាយណាស់ក៏មិនចេះអស់។ ខាងក្រោមនេះ ជាច្រកបូមលុយធំៗមួយចំនួន ដែលអ្នកមាន ឬសេដ្ឋីៗជាច្រើនចូលចិត្តធ្វើខ្លាំងបំផុត ខណៈអ្នកក្រមិនសូវអើពើរួមមានដូចជា៖

១.បង្កើនប្រភពចំណូលអកម្មឱ្យបានច្រើនតាមដែលអាចធ្វើទៅបាន៖ ចំណូលអកម្ម គឺជាប្រភពចំណូលមួយដែលអ្នកមានស្ទើរតែទាំងអស់នោះ“មាន”ពីព្រោះប្រភពចំណូលនេះ ធ្វើឱ្យពួកគេអាចរកចំណូលបានស្រួលមិនចំណាយកម្លាំង និងមានសាច់ប្រាក់ហូរកុងធនាគារជាប្រចាំថ្ងៃ ប្រចាំខែ និងប្រចាំឆ្នាំមិនដាច់ បើទោះបីជាពួកគេមិនធ្វើអ្វីក៏ដោយ។ ឧទាហរណ៍៖ ពួកគេធ្វើអាគារ សំណង់ ដើម្បីជួលឱ្យពួកអ្នកធ្វើអាជីវកម្ម និង ខ្លះទៀតធ្វើផ្ទះជួល ដីជួល ឬធ្វើអ្វីផ្សេងៗបង្កើតចំណូលបន្ថែមឱ្យពួកគេ។

២.ចំណូលពីជំនាញ និងបទពិសោធន៍៖រឿងមួយ ដែលពួកអ្នកមានចូលចិត្តធ្វើ នៅក្នុងសម័យបច្ចុប្បន្ននេះ គឺពួកគេចាប់ផ្តើមយកភាពល្បីល្បាញ និងភាពខ្លាំងរបស់ខ្លួន យកទៅបង្កើតជាចំណូលបន្ថែម។ ជាក់ស្តែង ដូចលោក Robert Kiyosaki ជាដើម គាត់បានយកជំនាញសរសេរសៀវភៅ និងបទពិសោធ របស់ខ្លួន ទៅនិពន្ធសៀវភៅ ដើម្បីបង្កើតចំណូល ហើយសៀវភៅ Rich Dad Poor Dad របស់លោកនោះ អាចលក់បានដល់រាប់លានក្បាល និងទាញចំណូលរាប់លានដុល្លារ ធ្វើឱ្យគាត់ក្លាយជាមហាសេដ្ឋី ។

៣.ចំណូលពីភាគលាភ៖ ពួកអ្នកមាន ឬសេដ្ឋីៗភាគច្រើន តែងតែយកលុយរបស់ខ្លួន ទៅទិញយកភាគហ៊ុនល្បីៗណាមួយ ដែលកំពុងមានសក្តានុពលខ្លាំង ដើម្បីបង្កើតប្រាក់ចំណូលរបស់ពួកគេ។ ជាក់ស្តែង ដូចសេដ្ឋីវ័យក្មេង Mark Zuckerberg មេធំក្រុមហ៊ុន Facebook ជាដើម។ គាត់បានទិញយ ក Instargram ក្នុងតម្លៃតែ ១ពាន់លានដុល្លារប៉ុណ្ណោះ ហើយនៅក្នុងឆ្នាំ២០១៩ កន្លងទៅនេះ Instargram អាចរកប្រាក់ចំណូលបានមិនក្រោម ២០ពាន់លានដុល្លារនោះឡើយ ដែលធ្វើឱ្យ មេធំហ្វេសប៊ុកអាចកើបលុយរាប់ពាន់លានដុល្លារពីការទិញយក Instargram ។

៤.ចំណូលពីការវិនិយោគ៖ មែនទែនទៅការកសាងប្រភពចំណូលអកម្ម គឺវាមិនសូវខុសគ្នាពីការវិនិយោគទេ គឺការយកលុយទៅបង្កើតលុយដូចគ្នា។ អ្នកមាន ឬសេដ្ឋីគេមិនចូលចិត្តយកលុយទៅដាក់ក្នុងធនាគារ ឬយកទៅសន្សំទុកនោះទេ ពួកគេតែងតែ យកលុយទៅវិនិយោគលើភាគហ៊ុន អចលនទ្រព្យ បង្កើតអាជីវកម្មថ្មីដែលមើលទៅអាចរីកចម្រើន ហើយខ្លះទៀតចូលចិត្តយក លុយទៅទិញផ្ទះ ឬក៏ទិញដី នៅតំបន់ណា ដែលមានសក្តានុពលខ្លាំង ដើម្បីទុកលក់យកប្រាក់ចំណេញនៅពេលក្រោយ ។

ទន្ទឹមនឹងនេះ សេដ្ឋីៗមានប្រភពចំណូលច្រើនច្រក និងលើសពី២ ភាគច្រើនគឺជាប្រភពចំណូលអកម្ម ដើម្បីឱ្យយើងអាចមានប្រភពចំណូលច្រើន ខណៈពេលដែលយើងមានប្រាក់ខែតិចតួច លោកអ្នកគួរតែកាត់បន្ថយការទិញបំណុលរួមមានដូចជាសម្ភារទំនើបៗ ឡាន ដែលយើងមិនចាំបាច់ និងគ្រឿងលំអជាដើម។ ចាប់ផ្ដើមរៀនសន្សំលុយ រៀនពីវិធីសាស្ត្រវិនិយោគ និងរៀនពីការបង្កើតប្រភពចំណូលអកម្មឱ្យបានច្រើន យូរឬឆាប់លោកអ្នកនឹងមានចំណូលច្រើនច្រកជាក់ជាមិនខានឡើយនាពេលដ៏ខ្លីខាងមុខនេះ ។